Qeveria e Kosovës ka zhvilluar mbledhjen e 150-të me radhë, në mënyrë elektronike, në të cilin ka miratuar vendimin me të cilin ka dhënë mendim lidhur me kandidaturat e propozuara nga Paneli Seleksionues për përzgjedhjen e Guvernatorit të Bankës Qendrore të Republikës së Kosovës.
“Me vendimin e miratuar, Qeveria e Republikës së Kosovës pajtohet me kandidaturat e propozuara nga Paneli Seleksionues për përzgjedhjen e Guvernatorit të Bankës Qendrore të Republikës së Kosovës dhe ky vendim do të përcillet në Kuvendin e Republikës së Kosovës”, thuhet në njoftimin e Qeverisë.
Sot, Banka Qendrore e Kosovës ka njoftuar se paneli për përzgjedhjen e Guvernatorit, i ka dërguar Kuvendit dy kandidatë për Guvernator të BQK-së.
Sipas njoftimit, Ahmet Ismaili ka marrë 84.67 pikë nga 100 maksimale, kurse Lulzim Ismajli, 73.67 pikë nga 100 maksimale.
“Banka Qendrore e Kosovës Paneli për përzgjedhjen e Guvernatorit/es të Bankës Qendrore ka dërguar në Kuvendin e Kosovës dhe Qeveri, listën e kandidatëve të përzgjedhur si në vijim: Ahmet Ismaili – (84.67 pikë, nga 100 maksimale),Lulzim Ismajli – (73.67 pikë, nga 100 maksimale)”, thuhet në njoftimin e BQK-së.
BQK-ja aktualisht udhëhiqet nga U.D i guvernatori Bashkim Nurboja i cili e ka marrë këtë detyrë pasi që i ka skaduar mandati Fehmi Mehmetit më 29 mars të këtij viti.
