Një mision nga Tifozat Kuq e Zi që shkon edhe përtej stadiumeve dhe futbollit.
TKZ nëpërmjet një njoftimi në faqen e tyre zyrtare në rrjetet sociale bëjnë të ditur se po nisin atë që e konsiderojnë si një mision kombëtar. Kështu, duke nisur nga jugu, TKZ ka marrë përsipër të fshijë shkrimet e ndryshme antishqiptare dhe në vend të tyre të reklamohen simbolet kombëtare.
Vendi i parë që i është nënshtruar këtij transformimi është Llogaraja teksa në një nga vendet më panoramike dhe më turistike të vendit është ekspozuar flamuri kuqezi.
Në komunikatën e tyre, TKZ thekson se kjo është një nismë me kontribut vullnetar e anëtarëve të grupit dhe veçanërisht atyre me banim në Zvicër.
Tifozët Kuq e Zi janë mbështetës të kombëtares gjithnjë pa kushte, në momente të vështira e deri te sukseset, ata kane qenë gjithnjë prezent në tribuna ndërsa nuk kanë munguar edhe mesazhet e përçuara, gjithnjë në mbështetje të idealeve kuqezi.
