“Refuzimi” i kryeministrit Albin Kurti për t’u takuar me homologun e tij nga Shqipëria, Edi Rama, ka ngjallur reagime të shumta. Duke diskutuar rreth kësaj teme, ish-ambasadori i Kosovës në Shqipëri, Sylë Ukshini thotë se takimi është dashur të mbahet.
Sipas tij, tani nuk ka qenë momenti që të llogaritet se “kush ka të drejtë më shumë e kush më pak”.
“Pavarësisht se Kurti mund të mendojë se e ka të drejtë dhe mund të ketë argument të qëndrueshëm për këtë, unë mendoj që nuk ka qenë momenti që tash të bëhen llogaritë kush ka të drejtë më shumë dhe kush më pak…sepse kemi çfarë të takojmë. Shqipëria është pjesë e NATO-s, është pjesë e OSBE-së…është po ashtu edhe në Këshillin e Sigurimit. Janë instanca ku do të diskutohet për Kosovën në javë dhe muajt në vazhdim…kryeministri ka mund ta kopsit në detaje të ia dorëzoj kryeminstrit Rama, t’i thotë që në ato vende ku s’kemi ne qasje ta dërgojë pozicionin tonë, të ndajë informacione, të shkëmbejë qëndrime”, deklaroi ai në “Këndi i Debatit” në Tëvë 1.
Ish-ambasadori shtoi se tani është e rëndësishme për të pasur raporte intensive duke ditur se Shqipëria është në Këshillin e Sigurimit, NATO-s dhe OSBE-së.
Kryeministri Kurti ka “refuzuar” të takohet me Ramën, pasi siç ka thënë ai, e konsideron të arsyeshme “një mbledhje të përbashkët të dy Qeverive, por jo takime të tjera”. /Teve1.info/
