Opinionisti nga Shqipëria, Ben Andoni e ka cilësuar jo normal refuzimin e kryeministrit Albin Kurti për të pritur në takim në Prishtinë, kryeministrin shqiptar, Edi Rama.
Sipas Andonit, këto refuzime siç ishte ai i Edi Ramës për anulimin e mbledhjes së dy qeverive dhe tash vendimi i Kurtit për të mos e takuar të njëjtin në Prishtinë, po bëhen për shkak të protagonizmave të dy liderëve.
Madje sipas tij, kjo po e pengon dhe po e vështirëson marrëdhënien mes të dyja vendeve.
“Për sa i përket refuzimit unë mendoj që nuk është normale ashtu siç nuk ishte normal nga ana e zotit Rama refuzimi i takimit me zotin Kurti ose të themi ai anashkalimi i mbledhje së përbashkët kjo për arsyen që një mbledhje e tillë kërkon energji kërkon kohë dhe mbi të gjitha nuk është as për zotin Kurti as për zotin Rama, por është për shqiptarët e Kosovës dhe të Shqipërisë në këtë sens më duket se protagonizmi i zotit Kurti dhe protagonizmi i zotit Rama duket që po pengon dhe po e vështirëson shumë marrëdhënien e dy vendeve tona”, tha Andoni në emisionin “Ditari” në Tëvë1.
Teksa tutje ai theksoi se kryeministri Rama e meriton të pritet nesër në Prishtinë nga kryeministri Kurti.
“Nuk shikojnë realisht problematikat reale me të cilat përballët faktori shqiptar sidomos tash çështja e Kosovës në veri, sesa merremi me këtë lloj pjese protagoniste të themi të zotit Rama dhe të zotit Kurti. Askënd nuk e pengon që brenda margjinave të jetë takimi i caktuar, të bëhet mbledhja e qeverive, por të bëhet edhe mbledhja e dy liderëve, por zoti Rama e shmangu këtë. Ndërkohë që vizita e zotit Rama në Kosovë, unë mendoj që e meriton që të pritet edhe nga kolegu i tij zoti Kurti. Megjithatë kjo është zgjedhja e tij që në mendimin tim nuk është e mirë, sepse për shkak të interesave të vogla ne nuk mund prishim atë pjesën e marrëdhënies që kemi ndërmjet dy vendeve tona”, shtoi Andoni.
Ndryshe kryeministri Kurti sot tha se e sheh të arsyeshme mbledhjen e përbashkët mes Qeverive e jo takim personal me Ramën
“Unë e konsideroj të arsyeshme një mbledhje të përbashkët të dy Qeverive, por jo takime të tjera”, tha Kurti.
Teksa kryeministri Rama kishte anuluar mbledhjen e përbashkët ndërmjet dy qeverive e planifikuar të mbahej më 14 qershor në Gjakovë.
Këtë e kishte bërë me arsyetimin lidhur me situatën në veri dhe kishte kërkuar një takim të një formatit tjetër mes dy kryeministrave dhe ministrave të Jashtëm të dy vendeve.
Qeveria e Kosovës kishte thënë se anulimi i një mbledhje të dakorduar në mënyrë të njëanshme ka ndodhur për herë të parë, duke thënë se formati i takimit të propozuar nga Rama do të mund të mbahej po atë ditë. /Teve1.info/
