Kryeministri i Kosovës, Albin Kurti, sërish i quan të padrejta masat ndëshkuese të BE-së, të cilat u vendosen për shkak të mos-shtensionimit të situatës në veri të Kosovës.
Kurti tha se bëhet fjalë edhe për anulim të vizitave
“Është e vërtetë që janë paralajmëruar masa të cilat edhe janë zbatuar disa prej tyre. Ju e dini që ushtrimi i madh ‘Defender Europe ‘2023’ sidomos në Gjakovë kur e kishim të planifikuar, u pat anuluar.Bëhet fjalë edhe për anulim të vizitave, por gjithsesi bëhet fjalë për masa të përkohshme e të cilat për bindjen time janë të padrejta”, ka shtuar Kurti.
Kurti ka folur gjatë ceremonisë së punimeve në rrugën Prishtinë – Podujevë, ku tha se opozita nuk po i voton marrëveshjet ndërkombëtare.
“Ajo çfarë ne dhe duhet të bëjmë është që në Kuvendin e Kosovës me dy të tretat e votave të deputetëve t’i kalojmë ato kredi dhe grante të cilat kanë negulur të ngujuara dhe të cilat nuk po mund t’i gëzojë ekonomia e Kosovës, në vlerën e përgjithshme prej 149 milionë euro, pra kredi dhe grante ndërkombëtare”, tha kryeministri.
Tutje ai tha se ka një ngujim, i cili sipas tij mund të tejkalohet bashkërisht në Kuvendin e Kosovës.
“Teksa mërzitemi për masat e ardhshme të përkohshme, e kemi një ngujim aktual të cilin mund ta kalojmë shumë kolllaj bashkërisht në Kuvendin e Kosovës”, tha ai./teve1.info/