Politologu, Fidan Ukaj, tha se me lirimin e tre zyrtarëve policorë nga autoritetet e Serbisë, tashmë “topi” është te Kosova, duke shtuar që kryeministri, Albin Kurti tani duhet ta bëjë hapin e radhës për shtensionimin e situatës në veri.
Sipas Ukaj, shtensionimi i situatës mund të bëhet vetëm me dy alternativa, shkruan teve1.info.
“Serbia e bëri një lëvizje edhe pse të vonuar e taktike, liroi tre policët, tanimë më “topi” siç duket është te Kosova. Pikërisht pse “topi” ka rënë te Kosova, Kurti duhet ta bëjë hapin e radhës, duhet t’i organizojë këto zgjedhje dhe të tregojë që është pro kërkesave të Bashkësisë Ndërkombëtare. Kemi një ripozicionim të Bashkimit Evropian dhe Shteteve të Bashkuara të Amerikës, rreth tri pikave që tashmë janë të njohura për Qeverinë e Kosovës. Për uljen e tensioneve, është alternative e fundit që Kurti duhet t’i përgjigjet pozitivisht kërkesës së Bashkësisë Ndërkombëtare për t’u mbajtur procesi zgjedhor. Alternativat janë, peticioni dhe dorëheqja. Më e rëndësishme është që këta kryetarë, ose përmes peticionit, ose përmes dorëheqjes, të jepet mundësi e një procesi të ri zgjedhor në atë pjesë të vendit. Zotimet që janë bërë në Bruksel që procesi zgjedhor të realizohet në terren”, deklaroi Ukaj në emisionin “Ditari”.
Më tej, Ukaj vlerësoi që nëse flitet për vullnet dhe ligjshmëri, atëherë kryetarët e katër komunave veriore duhet ta përfundojnë mandatin.
“Tashmë është shumë e parëndësishme vendi ku duhet të punojnë kryetarët, në objekte komunale apo në objekte alternative”, shtoi tutje Ukaj në Tëvë1.
Ndërkaq, sa i përket 5 kërkesave të Kurtit ndaj BE-së, Ukaj vlerësoi që tanimë ato kërkesa të kryeministrit kanë rënë poshtë.
“Kurti pati 5 kërkesa për BE-në, mirëpo ne e pamë përgjigjen e tyre. Do të thotë, kërkesat e Kurtit kanë rënë poshtë. Nuk do të kishte shpresë nëse Kurti s’do t’i pranonte asnjë nga pikat, mirëpo ai tashmë e ka pranuar pikën kryesore të BE-së, pra zgjedhje të reja në veri”, tha ai.
Kujtojmë që Kurti ka thënë se pajtohet për zgjedhje të parakohshme në veri të Kosovës, por së pari, ka thënë ai, duhet që bandat e mbështetura nga Beogradi të kthehen në Serbi ose të arrestohen në Kosovë./teve1.info/.
