Kryetari i AAK-së, Ramush Haradinaj, ka parë nga afër situatën e krijuar në Pejë pas reshjeve të mëdha të shiut.
Haradinaj tha se ka ndarë dhimbjen me familjen Ademaj, e cila ka humbur dy anëtarë si pasojë e reshjeve të shiut.
Ai i ka bërë thirrje Qeverisë së Kosovës dhe institucioneve relevante për mobilizim të menjëhershëm duke ndarë një fond emergjent për t’u dalë në ndihmë të gjitha familjeve në nevojë.
“Vizitova sot qytetin e Pejës, për të parë nga afër situatën e krijuar pas vërshimeve. Ndamë dhimbjen me familjen Ademaj, e cila humbi më të dashurit e tyre në këtë tragjedi. Ftoj Qeverinë e Kosovës dhe institucionet relevante për mobilizim të menjëhershëm duke ndarë një fond emergjent për t’u dalë në ndihmë të gjitha familjeve të cilat pësuan nga këto vërshime. Jemi me qytetarët e Pejës në këto ditë të vështira!”, ka shkruar Haradinaj në Facebook.
