Kryeziu si të arritur të kësaj qeverie ka përmendur pandeminë, ekonominë, sistemin e drejtësisë si dhe luftimin e krimit dhe korrupsionit
“Vitin që po lëmë pas, dhe qeverisja jonë 1 vjeçare e ka sjellë një rregull në Qeveri në raport me përdorimin e paras dhe pronës publike dhe të njëjtën kohë se ka një mbështetje solide në Kuvend, i ka ofruar Kosovës një stabilitet institucional politik e Qeverisë meqë për shumë gjatë i ka munguar Kosovës…”, tha ai.
Kryeziu në emisionin “Këndi i Debatit”, në Tëvë1, thotë se njëri ndër prioritetet e Qeverisë ka qenë edhe sistemi i drejtësisë.
“Si një prej prioriteteve tona ka qenë sistemi i drejtësisë, dhe reforma e domosdoshme në atë sistem. Kemi bërë hapat e parë të procesit të vetingut…Kemi bërë miratimin e ligjit për Gjykatën Komerciale e cila ka qenë premtim zgjedhor i LVV-së”, ka thënë Kryeziu.
Sipas tij, Qeveria “Kurti” ka qenë e pashoq në luftimin e krimit dhe korrupsionit.
“Kjo qeveri ka qenë me të vërtetë e pashoq në luftimin e krimit dhe korrupsionit përveç faktit që nuk ka prodhuar dhe nuk ka qenë pjesë e asnjë afere korruptive të keqpërdorimeve brenda qeverisë, ajo ka qenë efikase edhe ne luftimin e saj tek ata të cilët janë shkelës të ligjit”, tha ai .
Kryeziu ka deklaruar se rreth 230 zyrtarë publikë dhe shtetërorë janë arrestuar për keqpërdorim të pozitës, detyrës dhe përfshirjes në praktika korruptive.
“Janë shkatërruar mbi 50 grupe kriminale dhe përpos kësaj në total janë diku rreth 230 apo 240 zyrtarë publikë dhe shtetëror që janë arrestuar për keqpërdorim të pozitës, detyrës apo përfshirje në praktika korruptive. Qeveria jonë gjatë këtij viti ka prezantuar disa politika të cilat kanë karakter të pakthyeshëm, psh nga viti i kaluar ka filluar ndarja për shtesat për lehonat, ku mbi 13 mijë nëna të reja përfitojnë e mbi 146 mijë fëmijë tashmë fitojnë. Ka bërë një politikë të pakthyeshëm që ka bërë arsimin publik falas”, ka thënë Kryeziu.
Ai thotë se “suksesi i një qeverie vlerësohet në politika të atilla që do të kenë frute edhe kur ajo nuk është aty”. /teve1.info/
