Kryeministri i Kosovës, Albin Kurti, është takuar me sekretarin e Shtetit të Selisë së Shenjtë, Kardinalin Pietro Paroli, ku është diskutuar për raportet historike me Vatikanin dhe për historikun e marrëdhënieve ndërmjet Kosovës.
Kurti në këtë takim ka cekur rëndësinë dhe rolin pozitiv që njohja nga Vatikani do ta kishte për shtetin, shoqërinë dhe popullin e Kosovës.
“Kryeministri theksoi rëndësinë e avancimit të marrëdhënieve diplomatike ndërmjet dy shteteve dhe rolin pozitiv që njohja nga Vatikani do ta kishte për shtetin, shoqërinë dhe popullin e Kosovës, për rajonin dhe për paqen e qëndrueshme”, thuhet në njoftimin e Zyrës së Kryeministrit.
Zyra e Kryeministrit ka bërë të ditur se në këtë takim tutje është diskutuar edhe për procesin e dialogut me Serbinë.
“Kryeministri Kurti dhe Sekretari i Shtetit, Kardinali Paroli folën edhe për procesin e dialogut të ndërmjetësuar nga Bashkimi Evropian dhe për zhvillimet e fundit në kuadër të tij. Kryeministri tha se zgjidhja dhe rruga përpara është zbatimi i plotë, i shpejtë dhe pa kushte i Marrëveshjes Bazike të 27 shkurtit dhe Aneksit të saj të dakorduar me 18 mars në Ohër të Maqedonisë së Veriut. Ai shtoi se Kosova është dëshmuar në vazhdimësi palë konstruktive për gjatë gjithë procesit dhe gjatë fazave të negocimit të marrëveshjeve”, thuhet tutje në njoftim.
Në këtë takim, Kurti ishte i shoqëruar nga përfaqësuesi i Kosovës për Selinë e Shenjtë, Vehbi Miftari dhe ministrja e Industrisë, Rozeta Hajdari.
Pas këtij takimi, kryeministri Kurti ka përfunduar qëndrimin e tij në Itali dhe vizitën e tij zyrtare në Vatikan./teve1.info/