Deputetja e Partisë Demokratike të Kosovës, Blerta Deliu ka hedhur kritika kundrejtë qasjes së Qeverisë së Kosovës në raport me veriun e vendit dhe moskoordinimit me aleatët ndërkombëtarë.
Deliu në seancën parlamentare tha se situata në veri të Kosovës është rezultat i qasjes aventureske të kryeministrit Albin Kurti ku sipas saj, tashmë në atë pjesë kemi më pak rend, ligj e siç tha ajo më pak shtet.
“Sot si rezultat i qajes aventureske të Albin Kurtit kemi më pak sovranitet në pjesën veriore. Kemi më pak siguri, më pak rend dhe ligj, pra kemi edhe më pak shtet. Çfarë kemi sot janë sulmet e vazhdueshme të papranueshme të partisë në pushtet për NATO-n si organizatë paqëruajtëse që garanton integritetin territorial të Kosovës, për Shtetet e Bashkuara të Amerikës si garanci e shtetësisë sonë. Nxitja e një gjuhe të tillë shpërfillëse dhe mosmirënjohëse nga eksponentë të pushtetit është prej qëllimeve të qarta të Serbisë në luftën e saj hibride ndaj shtetit tonë “, tha ajo.
Deliu tutje shtoi se “shumica e popullit të Kosovës të cilët kanë votuar për partinë e cila sot është në pushtet asnjëherë nuk kanë votuar për cenim apo prishje të raporteve me aleatët tanë”./teve1.info./
