Laura Fazliu ka fituar medaljen e bronztë në Grand Slamin e xhudos në Kazakistan.
Laura garoi të shtunën në kategorinë deri 63 kilogramë, ndërsa për medalje të bronztë e mposhti rusen Dali Liluashvili. Ajo garoi si e pavarur.
Laura ka dominuar plotësisht, ndërsa pak para fundit realizoi hedhje të bukur për uazari.
Laura e nisi ditën me fitore ndaj Esmigul Kuyulova të Kazakistanit. Më pas pësoi nga jugkoreanja Jisu Kim.
Në repesazh mposhti fillimisht rusen Kamila Badurova e më pas Liluashvilin. Laura, si zakonisht, është shquar edhe me aksione të bukura.
Ajo ka fituar 500 pikë të rëndësishme në ranglistën botërore.
Për Laurën është medalja e tretë këtë vit.
Të shtunën garuan edhe Akil Gjakova e Loriana Kuka. Akili u rendit i shtati në kategorinë deri 73 kg, ndërsa Loriana pësoi në luftën e parë. Të premten Nora Gjakova fitoi medalje të argjendtë.
Grand Slami në Astana të Kazakistanit ishte një tjetër garë e suksesshme për xhudon kosovare.
