Ish-diplomati Tomor Avdia vlerëson se vendimi i kryeministrit Rama që të mos udhëtojë në Gjakovë me kabinetin e tij për mbledhjen e dy qeverive, është vendim që nuk duhet të merret, sepse të dy Qeveritë duhet të gjejnë çdo lloj mënyrë për të pasur komunikim.
Ky komunikim sipas Avdiajt duhet të bëhet pa ndonjë procedurë protokollare apo ndonjë kërkesë shumë të rëndësishme për palën.
Në emisionin InfoNata në Tëvë 1, Avdiaj ka thënë se Rama ka atribute për t’i ofruar ndihmë Kosovës por jo të ekzekutojë veprime që i takojnë autoriteteve të Kosovës.
“Kryeministri i Shqipërisë ka atribute për mbrojtjen e interesave, mbështetjen e institucioneve të Kosovës, t’i ofrojë ndihmë në të gjitha anët për t’i realizuar interesat institucionet e Kosovës dhe drejtuesit e tyre në raport me dialogun, me partnerët dhe në shumë raporte të tjera. Por jo të vendosin të flasin, të ekzekutojnë veprime në të drejtën e autoriteteve të Kosovës”, ka thënë Avdia.
Ai tutje thotë se përderisa Rama flet për cilësinë e zgjedhjeve në veri, ai harron që vendi i tij është shumë keq për nga cilësia e këtyre zgjedhjeve.
“Sepse zoti Rama nuk është zgjedhur nga këta qytetarë, nuk ka përfaqësim nga këta qytetarë dhe është aq më keq ku z. Rama në retorikën e tij të gjatë në konferencë për media përmendi disa herë cilësitë e zgjedhjeve në veri, ku z.Rama për nga cilësia e zgjedhjeve nuk është vendi i fundit në Evropë por mund të jetë edhe në botën e tretë”, ka thënë Avdia.
