Të barrikaduar dhe të gatshëm për secilin eventualitet ushtarët e KFOR-it po qëndrojnë vazhdimisht në këmbë.
Mirëpo, protestuesit vazhduan të qëndrojnë të ulur dhe nën hije të tendave të vendosur.
Disa luanin lojëra, e disa të tjerë freskoheshin me pije.
Këta vazhdimisht po rrinë këtu deri në ora 16:00 të pasdites.
Njësoj si serbët e Zveçanit, po veprojnë edhe ata në Leposaviq dhe Zubin Potok.
Veçse për dallim nga dy komunat tjera, në Leposaviq, kryetari i ri i kësaj komune, Lulzim Hetemi, po e vazhdon qëndrimin e tij brenda objektit komunal.
E për sigurinë e kryetarit dhe të objektit po përkujdesen pjesëtarët e KFOR-it amerikan.
Derisa, tash e disa ditë me radhë, në Zvecan dhe Zubin Potok, kryetarët Ilir Peci dhe Izmir Zeqiri, nuk po dalin në objektet kryesore te komunave.
Ata po i shfrytëzojnë objektet alternative në fshatrat Lipë dhe Qabër.
E serbët përveç kërkesës për dorëheqje të tyre, po vazhdojnë të kërkojnë edhe largimin e njësive speciale nga veriu.
Me këto kërkesa, të cilat nuk u plotësuan as të shtunën, ata i përfunduan protestat e tyre, për t’u mbledhur sërish një ditë më pas.
Kronika e realizuar nga gazetari Arton Rama