Kryeministri i vendit, Albin Kurti, tha se me Projektligjin për Zgjedhjet e Përgjithshme, do të ketë rregullohen disa çështje të rëndësishme, përfshirë këtu edhe përparësinë që mërgimtarët do ta kenë për votim.
Gjatë seancës plenare në Kuvend, Kurti deklaroi se me këtë projektligj, KQZ do të ndajë fonde publike shtesë për secilin mandat të fituar nga gratë mbi kuotën 30 përqind.
“Ndër çështjet më të rëndësishme, të cilat rregullohen me këtë projektligj janë: regjistrimi i votuesve jashtë vendit, mënyra e votimit jashtë vendit, e drejta e votës, numërimi i votave e fletëvotimeve të kandidatëve të subjekteve politike dhe mbështetja financiare shtesë për parti të cilat krijojnë hapësirë për numër më të madh të deputeteve gra. Me projektligjin e ri, KQZ-ja ndan fonde publike shtesë, në vlerë prej 1 përqind të shumës së përgjithshme të alokuar për subjekte politike për secilin mandat të fituar nga gratë mbi kuotën 30 përqind në momentin e certifikimit”, deklaroi Kurti para deputetëve.
Njëherit, Kurti tha se me projektligjin e ri parashihet regjistrimi online përmes një platforme që do ta krijojë KQZ, në mënyrë që votuesit nga mërgata të mos kenë nevojë të dërgojnë dokumente të shumta përmes email-it apo postës.
“Me platformën e regjistrimit online synohet të zvogëlohen barrierat teknike e procedurale, por edhe të ulet kostoja e të rritet efikasiteti”, shtoi tutje Kurti.
Derisa në përmbyllje, Kurti theksoi se ligji i ri për zgjedhjet do t’i japë fund padrejtësisë së gjatë që u është bërë të gjithë mërgimtarëve./teve1.info/.
