Serbët lokalë janë duke vazhduar protestat në tri komunat në veri të Kosovës, Zveçan, Zubin Potok dhe Leposaviq. Mirëpo protesta e sotme ka qenë e qetë, me ç’rast KFOR ka larguar telat gjemborë në Zveçan.
Punëtorët serbë të Komunës së Zveçanit edhe të hënën dolën në protestë. Ata aty qëndruan nga ora 8:00 e mëngjesit e deri në orën 15:00.
Edhe këtë dite, protestën këtu po e udhëheqin dy krerët e Listës Serbe, Goran Rakiq e Igor Simiq.
Si vend qëndrimi për këta te fundit dhe disa protestues të tjerë, po shërben objekti afër komunës.
Edhe të hënën për sigurinë po kujdesej KFOR-i. Këta të fundit në mesditë, larguan telin me gjemba, të vendosur këtu ditë më parë.
Por, ajo që alarmoi protestuesit, ishte një veturë e Policisë së Kosovës. Këta të fundit u futën mes protestuesve në rrugën që të shpie drejt Komunës.
Kjo gjë mobilizoi serbët, të cilët bllokuan veturën e policisë, e cila arriti të largohet vetëm më ndihmën e KFOR-it.
Pas kësaj, Policia e Kosovës njoftoi se një veturë zyrtare, është sulmuar në Zveçan.
“Mund të konfirmojmë se, një veturë policore e cila ka qenë me detyrë zyrtare duke patrulluar në drejtim të Komunës së Zveçanit, është penguar dhe sulmuar me mjete te forta nga protestuesit. E ashtu si filloi dita në Zvecan, edhe përfundoi. Edhe në fundin e saj, punëtorët serbë të kësaj komune, e nënshkruan përfundimin e orarit të punës”, njofton Policia
Ashtu sikurse në Zvecan, e hëna ishte ditë e qetë edhe në Komunën e Leposaviqit e Zubin Potokut.
