Përzgjedhësi i ri, Alain Giresse ka thënë se është i gatshëm për të debutuar në krye të përfaqësueses së Kosovës për dy ndeshjet e muajit mars.
Në konferencën për shtyp, Giresse deklaroi se ky grumbullim do t’i shërbejë për t’u njoftuar me lojtarët dhe objektivat që i kanë si ekip para vetes.
“Pas publikimit të listës së lojtarëve për këto dy ndeshje, dhe para se gjithash me rëndësi është njoftimi më lojtarët, që të njihemi së bashku, pastaj të njoftohen me mënyrën e organizimit, punës dhe si do të funksionojmë në këto dy miqësore. Padyshim, do të tentojmë të ftojmë pothuajse të gjithë lojtarët e ftuar. Është shumë normale për një trajner të ri që t’i njoh kapacitet e lojtarëve, por jo për të ndërruar komplet strukturën. Duhet të vazhdojmë me dinamikën e ekipit aty ku ka mbetur. Secili lojtar duhet ta tregojë veten në lidhje me objektivat që i kemi para vetes”, ka thënë Giresse.
Po ashtu, tekniku francez ka folur edhe për sulmuesin Emir Sahiti që është ftuar për herë të parë te Kosova, por që do të mungojë për shkak të lëndimit dhe pritet të zëvendësohet me ndonjë tjetër.
“Sahiti është lënduar dhe mungon, do të tentojmë ta zëvendësojmë. Po ashtu, edhe sot do të mbajmë një stërvitje prej orës 18:30, ndonëse ishte e paplanifikuar”, është shprehur Giresse.
69-vjeçari ka folur edhe për situatën e Leart Paqaradës, ku la edhe derë të hapur për mbrojtësin e krahut.
“Jam i informuar që ka ndodhur një problem me lojtarin në fjalë, do të shohim se çka do të ndodhë në të ardhmen. Do të duhet të njihem më shumë me lojtarët dhe ka gjasa që të ftohet edhe ai”.
Giresse ka thënë se dy miqësoret e këtij muaji, do t’i shërbejnë për t’u përgatitur sa më mirë për Ligën e Kombeve, e cila nis në muajin qershor. Ndërsa, sa i përket objektivave në këtë ligë, Giresse tha se ato janë maksimale.
“Janë dy ndeshje që na shërbejnë të përgatitemi sa më mirë për Ligën e Kombeve, në të cilën do të futemi me ambicie maksimale”, u shpreh Giresse.
Kosova më 24 mars luan në Prishtinë ndaj Burkina Fasos kurse pesë ditë më vonë, në Zuerich përballet me Zvicrën.
/Tëvë1/
