Akademia e Shkencave dhe Arteve të Kosovës ka reaguar pas ngjarjeve të fundit në veri të vendit.
ASHAK vlerëson se dhuna e shkaktuar në veri është rezultat i politikave pro-ruse të Beogradit.
Teksa ka fajësuar Akademinë serbe për nxitje të këtij konflikti.
“Me këtë rast shprehim keqardhjen tonë të thellë që Akademia Serbe e Shkencave dhe e Arteve (SANU), hartuese e “Memorandumit” dhe ideatore e “botës serbe”, paraqitet sërish në publik me deklaratat e saj të zakonshme nacionaliste, duke e nxitur konfliktin dhe duke i quajtur zhvillimet në veriun e Kosovës dhe sulmet e bandave kriminale serbe mbi ushtarët e KFOR-it si “dhunë mbi popullin serb”. Akademia Serbe do të duhej të ndalojë të “prodhojë ide” dhe të hartojë politika që destabilizojnë Kosovën dhe mbarë hapësirën ballkanike”, thuhet në një komunikatë.
Akademia po ashtu ka ftuar Qeverinë që në këtë situatë të bashkërendohet me aletatët.
“Institucionet e Republikës së Kosovës, duke zbatuar detyrimet kushtetuese të një vendi demokratik europian dhe në miqësi me SHBA-në, është e domosdoshme të përballojnë situatat e rrezikshme në bashkëpunim dhe bashkërendim me aleatët, për të mirën e qytetarëve të Republikës së Kosovës dhe të paqes e të sigurisë në rajon”, thuhet tutje në reagim.
