Janë bërë pesë ditë që kur veriu i Kosovës është i tensionuar.
Që nga e premtja atje ka pasur vazhdimisht protesta të serbëve lokalë të cilët edhe kanë eskaluar në dhunë ndaj zyrtarëve të KFOR-it të hënën.
Protestuesit kanë sulmuar me gurë e me gjësende tjera paqeruajtësit në Kosovë, ku 25 prej tyre u lënduan e 3 ishin me lëndime të rënda. Madje sulme pati edhe ndaj medieve. Disa vetura u dogjën e disa u demoluan.
Për të gjitha këto, reagime nga institucionet pati vetëm përmes komunikatave për shtyp.
E kjo formë e reagimit po konsiderohet si e gabuar për institucionet.
Naim Jakaj nga Instituti Kosovar për Drejtësi vlerëson se Qeveria tashmë është dashur të thërras seancë të jashtëzakonshme në Kuvendin e Kosovës, për të diskutuar gjendjen e sigurisë në vend.
Ai tregon se një gjë e tillë tashmë është e pamundur për shkak të dispozitave ligjore, teksa shton se kjo mund të bëhet nga grupet parlamentare tjera.
Kurse, anëtari i Komisionit për Siguri dhe Mbrojtje, Hisen Berisha, konsideron se kjo është bërë qëllimshëm nga kryeministri, Albin Kurti.
“Mos thirrja e një seancë të jashtëzakonshme, e mos kërkimi i mbështetjes së spektrit politik, nga ana e Kryeministrit Kurti, tregon se veprimet në Veri mund t’i ketë bërë, pikërisht me pretekstin që e kam paralajmëruar që në shkurt, para pranimit të Planit franko-gjerman dhe ripërsëritur pas 18 Marsit dhe Aneksit të Ohrit dhe statuti i Beogradit i 2 Majit, për të implementuar marrëveshjet e dëmshme që ka bërë deri tani për Kosovën”, ka thënë Berisha.
Sipas nenit 68 të rregullores së Kuvendit, përpos krerëve të shtetit, thirrja për një seancë të tillë mund të bëhet nga nënshkrimet e 1/3 e deputetëve.
