Anëtari i Kryesisë së AAK-së, Labinot Gjini, vlerëson se Qeveria është dashur menjëherë të koordinohet me ShBA-në pas ngjarjeve të fundit në veri.
Sipas tij, fakti që KFOR-i po qëndron para policisë në protestat në komunat veriore, është një hap prapa për Kosovën.
“Zoti Kurti me të parë reagimin e ShBA-së që për ne ishte befasues dhe nuk ishim sigurtë si ta lexonim dhe interpretonim një ashpërsi të tillë, është dashur menëjëherë të afrohet me ShBA-në dhe ta riorganizojë apo rikoordinojë punën me ta. Tani jemi në një situatë ku KFOR-i ka dalur përpara policisë së Kosovës. Kjo nuk është pak. Deri tani KFOR-i ka qëndru prapa policisë. Ky është një hap komplet prapa. Kur del KFOR-i përpara dhe e ruan policinë e Kosovës, nuk është në favorin tonë. Kjo prezencë e KFOR-it në veri dhe del edhe përballet me dhunën, ne e shohim si hap prapa”, ka thënë Gjini.
Gjini thotë se pasi që është kërkesë e ndërkombëtarëve, policia ndoshta duhet të tërhiqet nga objektet komunale në veri, por asnjëherë nga territori verior.
“Në një situatë normale objektet komunale nuk ruhen nga policia sepse komuna është institucion i zgjedhur nga populli. Duke qenë situata ajo që është e që është e jashtëzakonshme, policia e Kosovës duhet ndoshta të qëndrojë aty. Por çështja shtrohet a mund të qëndrojë. Nëse amerikanët kërkojë që policia të largohet nga objektet, ndoshta ato duhet të tërhiqen nga objektet komunale por nuk duhet të tërhiqen nga territori verior”, ka deklaruar ai në Ditari në Tëvë 1.
