Policia e Kosovës e ka vlerësuar situatën si të brishtë por të qetë në tri komunat veriore ku protestohet për të tretën ditë me radhë, raporton tev1.info
Sipas një komunikate të Policisë së Kosovës lidhur me gjendjen në komunat me shumicë serbe: Leposaviq, Zubin Potok dhe Zveçan, një ditë më parë protestuesit individë dhe në grupe kriminale kanë shfaqur dhunë ekstreme duke i rrezikuar pjesëtarët e institucioneve të sigurisë.
“Referuar rrethanave dhe zhvillimeve të ndodhura dje (29.05.2023), ku protestues, individë/grupe kriminale, me dhunën ekstreme të shfaqur, kanë bërë që situata në aspektin e sigurisë në veri të vendit të përshkallëzohet dhe të degradojë deri në rrezikim të jetës së njerëzve, përfshirë jetën e zyrtarëve të institucioneve të sigurisë.
Protestat në tri komunat në veri të vendit Leposaviq, Zubin Potok dhe Zveçan po vazhdojnë edhe sot pranë objekteve komunale, situata aktualisht vlerësohet të jetë e brishtë, por e qetë”, thuhet në komunikatën e Policisë.
Sipas komunikatës, Policia e Kosovës, sipas detyrës zyrtare, po vazhdon me angazhime në ofrimin e sigurisë dhe mbarëvajtjen e protestave, si dhe po bashkëpunon/koordinon aktivitetet me KFOR-in dhe institucionet relevante. Njëkohësisht njësitet policore janë duke ndërmarrë të gjitha veprimet hetimore lidhur me rastet dhe zhvillimet e djeshme.
Policia e Kosovës edhe sot fton qytetarët për qetësi dhe të mos bien pre e thirrjeve për protestë të dhunshme dhe provokime të çfarëdo natyre qofshin ato, thuhet në komunikatën e Policisë.
