Ish-kryeministri Isa Mustafa vlerëson se zhvillimet e fundit në veri janë duke e përkeqësuar problemin mes Kosovës dhe Serbisë.
Mustafa shton se nëse potencialisht tërhiqet kjo Qeveri, ajo e ardhmja do ta ketë shumë më të vështirë këtë çështje.
“Është një mundësi që Qeveria të thotë nuk po pajtohem tash dhe po tërhiqem, po shkojmë në zgjedhje dhe ajo Qeveri që vjen prapë duhet me fillu aty ku e ka lanë kjo Qeveri. E tani niveli në të cilin është lënë problemi, është shumë më i rëndë sesa ato që ka qenë më parë. Sepse tani e kemi një situatë me një vakuum të plotë institucional në veri të vendit, me një mosdëgjueshmëri qytetare të serbëve ndaj institucioneve të Kosovës edhe në situatë të tillë është problem si me u gjet zgjidhja. Ato zgjidhje që kanë qenë përpara si zgjidhje, unë nuk i konsideroj që janë zgjidhje që sot munden me u bë, se për sa acarohet situata në veri, për kaq rriten apetitet edhe kërkesat edhe të komunitetit serb atje por edhe të Serbisë ndaj Kosovës, duke bërë trysni ndaj komunitetit ndërkombëtar edhe duke kërkuar që ndërkombëtarët të pajtohen me të”, ka thënë Mustafa.
Mustafa thotë se Asociacioni nuk është më zgjidhje porse i frikësohet rritjes së kërkesave e pazareve nga komuniteti serb e nga ndërkombëtarët.
“Unë nuk e shoh as Asociacionin si ndonjë zgjidhje, për atë Asociacion për të cilin është biseduar më 2013 dhe 2015. Zgjidhja atëherë ka qenë që të bëhet njëfarë organizimi, koordinimi i komunave me shumicë serbe mes veti që ajo të mos ketë kompetenca të pushtetit as lokal as qendror, mirëpo kjo që po ndodh tani është problem si do të përmbyllet me një zgjidhje të tillë dhe unë i frikësohem rritjes së pazareve, rritjes së kërkesave, sepse kërkesat nuk i rrisin jo vetëm serbët tani por komuniteti ndërkombëtar se ata këtë marrëveshje që u bë në Bruksel dhe Ohër, nuk është marrëveshje për zgjidhjen e problemeve të Kosovës si shtet, në të cilën Kosova vë sovranitet, por është marrëveshje vetëm me i nalë proceset të cilat rrezikonin paqen dhe sigurinë pasi që ndodhi konflikti në Ukrainë”, ka deklaruar Mustafa në InfoNata në Tëvë 1.
Ish i pari i LDK-së thotë se marrëveshja me Serbinë është vetëm për ta mbajtur një qetësi të përkohshme, e cila sipas tij është rrezikuar nga Qeveria e Kosovës. Mustafa thotë se Kosova karshi marrëveshjes ka detyra ndërsa Serbia vetëm zotime.
“Nuk është totalisht zgjidhje, kjo është vetëm çështje e një status quoje, një qetësie të përkohshme, për të cilën ka qenë e interesuar komuniteti ndërkombëtar për arsye se Qeveria e Kosovës po ndërmerr veprime të cilat po rrezikojnë këtë qetësi, ose këtë paqe dhe këtë siguri sepse edhe marrëveshja nëse shikohet, nuk ka asgjë të re. Janë disa deklarime shterpe dhe gjysmë shterpe. Kemi pjesë të cilat flasin për njëfarë zotimi të Serbisë që nuk do ta pengojë anëtarësimin e Kosovës në organizata ndërkombëtare, por Vuçiqi u deklaru dhe tha këtë nuk e implementoj. Kemi obligime të Kosovës që me bë Asociacionin sipas 2013 dhe 2015, pika 10 dhe me bë vetëmenaxhimin e serbëve edhe me siguru status të veçantë të Kishës Ortodokse serbe. Pra ne kemi detyra, Serbia ka vetëm zotime, për atë dhe s’po fillon me asgjë. Kemi një supozim mjaft të çuditshëm që thotë se supozohet që asnjëra prej palëve nuk do ta merr detyrën me përfaqësu palën tjetër. Supozimi është diçka krejt tjetër e nuk është zotim sepse në vend të supozimit është thënë që as Serbia nuk del me fol në emër të Kosovës dhe as e kundërta”, ka shtuar ai.
