Gazetarja e Tëvë 1, Fetije Kamberi ka thënë se situata në qytetin e Leposaviqit ka filluar të tensionohet.
Ajo në një paraqitje të drejtpërdrejtë ka deklaruar se gazetarët po gjuhen me vezë dhe po u bëhet presion për t’u larguar. Përderisa në sfond janë shfaqur disa fëmijë duke kënduar këngë nacionaliste serbe.
“Situata ka filluar të tensionohet, mediave po u kërkohet të largohen nga vendi i ngjarjes. Na janë afruar shumë qytetarë serbë duke bërë simbole të Serbisë. Nga kafiteria prapa meje po na gjuajnë edhe me vezë për t’u larguar”, ka thënë Kamberi.
Kamberi ka shtuar se pak metra larg i kanë policinë e KFOR-in të cilët nuk po reagojnë.
“Pak metra larg i kemi KFOR-in dhe policinë. Ata nuk janë afër neve. Ata po qëndrojnë anën time të djathtë. Nuk ka reagim prej policisë e KFOR-it edhe pse po na gjuajnë me vezë nga përballë KFOR-it”.
Teksa ka shtuar se kryetari i komunës së Leposaviqit vazhdon të qëndrojë brenda objektit të komunës bashkë me disa zyrtarë tjerë të VV-së
“Nga ora 5 e mëngjesit kryetari i Leposaviqit, Lulzim Hetemi është brenda objektit të Komunës. Me të gjenden edhe disa zyrtarë të tjerë të VV-së”, tha Kamberi, në emisionin special në Tëvë 1 për zhvillimet në veri.
