Kryetari i Asociacionit të Gazetarëve të Kosovës, Xhemajl Rexha duke folur për përshkallëzimin e situatës në veri të vendit ka ndjerë keqardhje për aksidentet që kanë ndodhur në raport me gazetarët të cilët ishin duke raportuar nga vendi i ngjarjes.
Rexha në Tëvë1, tha se rasti më i rëndë sot ka qenë djegia e veturës së televizionit Tëvë1, i cili sipas tij, ka vënë në rrezik pjesëtarët e ekipit të televizionit.
Madje Rexha tha se gjithë sulmet e sotme karshi veturave të mediumeve kanë ndodhur në prani të KFOR-it, teksa theksoi se KFOR-i asnjëherë nuk ka bërë asgjë që t’i ndihmojë gazetarët.
“Ndjej keqardhje për atë që ka ndodhur në Zubin Potok, por nga të gjitha aksidentet që kanë ndodhur sot është djegia e veturës të televizionit tuaj, që ka vënë në rrezik pjesëtarët e ekipit të Tëvë1. E mira është që s’ka pasur njerëz të lënduar, por veturat janë dëmtuar edhe në Leposaviq dhe në Zveçan janë hequr targat është vandalizuar. Janë hequr targat vetëm 20 metra larg KFORI-it dhe KFOR-i nuk ka bërë asgjë në asnjërin moment që t’i ndihmojë gazetarët”, tha ai.
Tutje sipas Rexhes të qenurit gazetar nga Prishtina në veri të Kosovës është gjithmonë rrezik, teksa theksoi se logot e mediumeve shqiptare janë cak i sulmeve.
“Thirrja jonë e vazhdueshme është që gazetarët kosovarë sidomos ata shqiptarë të Kosovës janë në rrezik për jetën kur raportojnë nga veriu i Kosovës. Grupe të maskuara të serbëve gjenden në secilin qosh dhe të qenurit gazetar nga Prishtina është gjithmonë rrezik. Logot tona janë cak i sulmeve dhe thirrja jonë e vazhdueshme është për KFOR-in, për Policinë e Kosovës që të bëjnë protokole të veçanta në të cilat do të sigurohen që gazetarët të jenë në gjendje të raportojnë të pa penguar nga ngjarjet në veri”, tha ai./teve1.info./
