Violeta Pirana, nga Shoqata e Pacientëve me Kancer të Gjirit, ka thënë se ilaçi “Valamar” që kuron sëmundjen e kancerit duhet të futet në listën esenciale të barnave.
Pirana, ka thënë se numri i pacientëve që e marrin këtë ilaç është shumë i madh, dhe ky ilaç duhet të merret tërë jetën jo vetëm për një kohë caktuar.
“Nuk ka të drejtë askush të dënoj me vdekje pacientin duke mos ja aprovuar ilaçin për jetë. Onkologët e KO duhet të insistojnë më tepër për ‘Ribociklib’. Ilaçi kushton shumë shtrenjtë dhe buxheti i familjeve kosovare nuk mund të mbuloj këtë ilaç”, ka shkruar ajo në Facebook.
Tutje, ajo ka ftuar të gjithë ata që marrin ‘Ribociklib’ të lajmërohen, në mënyrë që ta dinë numrin e saktë.
“Prandaj ftoj të gjithë që marrin ‘Ribociklib’ të lajmërohen që të kemi numrin e saktë. Askush, pra askush nuk ka të drejtë të mohoj të drejtën e jetës së qytetarit. LE është nënshkruar, por ‘Ribociklibi’ nuk është në këtë listë e që do të duhej medoemos të ishte”, ka shkruar Pirana.
“Lista Esenciale është nënshkruar por ribociclibi nuk është në këtë listë e që do të duhej medoemos të ishte. Mendoni për jetën e njeriut. Ftoj të gjithë që janë në pozita vendimmarrëse që të vendosin me arsye të shëndoshë dhe të ecin me këpucët e pacientit me kancerin e gjirit metastazik. Zgjidhje ka, por duhet vullnet. Përndryshe pacienti do të dorëzohet dhe kjo nuk do të jetë në rregull”, ka shtuar Pirana. /teve1.info/
