Rrjedhja e lumit bë shkak për vdekjen e katër vjeçarit nga fshati Akrashticë i Vushtrrisë.
Gjatë së martës njësitet e kërkim shpëtimit në kuadër të forcave të sigurisë u zhytën në tunelin e rrjedhës së lumit Ibër-Lepencë.
E rreth tri orë pas kërkimeve trupin e pajetë të viktimës e gjetën në kanalin e këtij lumi, konkretisht në fshatin Bukosh.
Zëdhënësi i Policisë për Rajonin e Mitrovicës, Avni Zahiti thotë se në momentin e rënies dyshohet se viktima ishte së bashku me një bashkëmoshatar.
“Pas kërkimeve policia, njësitet e kërkim shpëtimit në kuadër të forcave të sigurisë kanë gjet trupin e pa jetë të viktimës… dyshohet se mbrëmë viktima së bashku me një moshatare tjetër kanë qenë afër zonës që kanë rënë në vendbanimin e tij në Akrashticë dhe si pasojë e saj rrjedhja e lumit apo ujit e ka sjellë deri në Bukosh…”, tha ai.
Megjithatë, daja i viktimës tregon momentet e para se si u informua rreth ngjarjes.
“Në bazë të asaj qysh kom dëgju nga familjarët, kur e ka marrë lopën me një djalë të hallës së tij ka shku afër kanalit aty djali është afru aty ka rrëshit dhe ka ra… “, tregon Sadik Krasniqi.
Tutje, Krasniqi thotë se gjendja e familjarëve është jo e mirë, teksa ka edhe një kërkesë.
“Kërkoj me pas një mbrojtje sot ka ndodh te na nesër ndodh te dikush tjetër… gjendja e familjarëve është shumë e keqe motra nuk është mirë po mundohemi me qetsu…”,tha ai.
Sipas familjarëve dhe banorëve të fshatit raste të tilla kishin ndodhur dhe më parë.
