Drejtoria Kundër Terrorizmit, në koordinim me Prokurorinë Speciale ka arrestuar pesë persona të dyshuar për veprën penale ‘shtytje në kryerjen e veprës terroriste” dhe mbajtje të armëve në mënyrë të paautorizuar.
Arrestimi i tyre është bërë të hënën pas një aksioni të zhvilluar në gjashtë lokacione në rajonin e Pejës, Prishtinës dhe Gjilanit, pas hetimeve disa mujore thuhet në komunikatën e Policisë.
“Si rezultat i këtij operacioni, nën dyshimin e kryerjes së veprave penale ‘shtytje në kryerjen e veprës terroriste, sipas nenit 134 të KPRK-së’ dhe ‘mbajtje në pronësi, kontroll ose posedim të paautorizuar të armëve’, sipas nenit 366 të KPRK-së, janë arrestuar pesë persona të dyshuar (L. B., B. V., E. B., A. H. dhe A. S.), ndaj të cilëve janë duke vijuar procedurat ligjore. Të dyshuarit e lartcekur janë të njohur për Policinë e Kosovës, si të dyshuar për përfshirjen e tyre të mëparshme në disa vepra tjera penale në rajonin e Pejës”, thuhet në komunikatë, përcjell teve1.info
Bëhet e ditur se në cilësinë e provave dhe dëshmive materiale janë sekuestruar: tri (3) revole, një armë automatike AK-47, një armë rekreative pneumatike, pajisje elektronike dhe dëshmi tjera relevante lidhur me rastin.
Me urdhër të prokurorit të Prokurorisë Speciale, të dyshuarit ndalohen në ndalim policor, në kohëzgjatje prej 48 orëve/teve1.info/
