Kryetari i Kuvendit të Kosovës, Glauk Konjufca, ka përkujtuar martirët e fshatrave të Pejës, të cilët më 14 maj të vitit 1999 u bënë cak i masakrës çnjerëzore të forcave gjenocidale të Serbisë.
Konjufca ka thënë se këta martirë janë pjesë e të gjithë atyre të rënëve që e paguan lirinë dhe pavarësinë me jetën dhe sakrificën e tyre.
“Kriminelët e rekrutuar nga burgjet serbe në grupin paramilitar “Çakallët”, si pjesë kyçe e aparatit ushtarak të regjimit serb dhe gjenocidit të kryer në Kosovë, në koordinim dhe bashkëpunim të plotë me ushtrinë dhe policinë serbe vranë në mënyrë kriminale mbi 120 civilë të paarmatosur shqiptarë në fshtatin Qyshk, Zahaq, Pavlan dhe Llabjan”, ka shkruar kryeparlamentari në Facebook.
Ai tha se nderimi ndaj martirëve është zotim për të mos reshtur përpjekjet e përparimin në çdo sferë.
“Liria që ata mundësuan i bën martirë të paharrueshëm, por krimet ndaj tyre dhe kriminelët serbë që kryen akt gjenocidi dhe krime kundër njerëzimit akoma nuk janë ndëshkuar. Në kohën kur Republika e Kosovës i nderon të rënët për liri, Serbia mbron kriminelët e saj, për ta fshehur të vërtetën e saj gjenocidale”, ka shkruar Konjufca.
Sipas Konjufcës, përkushtimi do të jetë i pandalshëm deri kur liria që erdhi të sjellë edhe drejtësi për të gjithë të masakruarit e regjimit serb në Kosovë.
“Përkushtimi ynë do jetë gjithnjë i pandalshëm deri kur liria që erdhi të sjellë edhe drejtësi për të gjithë të masakruarit e regjimit serb në Kosovë, drejtësi që vjen përmes ndëshkimit të krimeve makabre të Serbisë, përmes ndëshkimit ndaj atyre që planifikuan, urdhëruan dhe zbatuan gjenocidin dhe krimet kundër njerëzimit në Kosovë. Lavdi martirëve të Qyshkut, Zahaqit, Pavlanit dhe Llabjanit, si dhe gjithë atyre që e dhanë jetën për liri e atdhe!”, thuhet në postimin e tij. /teve1.info/
