Misioni i NATO-s në Kosovë, KFOR, ka bërë të ditur se ka aprovuar kërkesën e Agjencisë Pyjore të Kosovës që të kryejnë fluturime në lartësi të ulëta me qëllim vaksinimin e dhelprave kundër tërbimit.
“Pas një kërkese të Agjencisë Pyjore të Kosovës, misioni KFOR i drejtuar nga NATO ka autorizuar fluturimin e avionëve privatë që nga 15 maji do të kryejnë fluturime në lartësi të ulëta me qëllim vaksinimin e dhelprave kundër tërbimit duke përdorur karremin”, thuhet në njoftimin e KFOR-it.
Tutje, KFOR ka theksuar se hapësira e sipërme ajrore e Kosovës mund të përdoret vetëm për të fluturuar mbi Kosovën nga një vend në tjetrin me fluturime komerciale.
“Hapësira ajrore e poshtme mund të përdoret për nevoja specifike, rast pas rasti dhe sipas autorizimit të mëparshëm nga komandanti i KFOR-it”, thuhet në njoftim.
Në njoftim thuhet se KFOR-i mbetet i përkushtuar në sigurimin e një mjedisi të sigurt për lirinë e lëvizjes për të gjitha komunitetet në Kosovë, në përputhje me mandatin e KFOR-it. /teve1.info/