Shefi i Grupit Parlamentar të Aleancës për Ardhmërinë e Kosovës, Besnik Tahiri ka deklaruar se një fenomen i rrezikshëm ka nis tash e së paku një vit në Kosovë.
Tahiri ka thënë se nuk janë vetëm të papunët që po ikin nga Kosova, por edhe ata që janë të punësuar, shkruan teve1.info
Sipas tij, nëse Qeveria vazhdon pa marrë asnjë masë e asnjë veprim për ta penguar këtë trend, Kosova rrezikon të jetë pa profesionistë, pa rini e pa shpresë.
“Një fenomen i rrezikshëm në vendin tonë ka nisë tash e së paku një vit, Kosovën po e lëshojnë e po ikin në vendet tjera, jo vetëm njerëzit e papunë, por për më keq, njerëzit që janë të punësuar në sektorin publik dhe sektorin privat. Në qoftë se vazhdon ky trend për të cilin Qeveria nuk është duke marrë asnjë masë, asnjë veprim për ta penguar, Kosova rrezikon të jetë pa profesionistë, pa rini dhe pa shpresë. Një plan konkret për pengimin e migrimit dhe krijimit të kushteve lidhet me dy veprime që si Aleancë i kemi sugjeruar: e para, me rishikim buxhetor rritja e koeficientit të pagës për të punësuarit në sektorin publik; e dyta, në sektorin ekonomik të dislokohen dhe zhbllokohen mjetet e projekteve kapitale”, ka shkruar Tahiri.
Tutje, Tahiri ka theksuar se ikjet që stimulojnë ikjen janë: rritja e çmimit të tatimit në pronë, rritja e çmimit të rrymës, mos ngritja e pagave, rritja e produkteve.
“Fatkeqësisht, deri sot, nuk ka asnjë veprim. Veprimet e vetme janë ato që e stimulojnë ikjen: rritja e çmimit të tatimit në pronë, rritja e çmimit të rrymës, rritja e çmimit të secilit produkt dhe mos ngritja e pagave. Qeveri vepro tash derisa nuk bëhet vonë për këtë vend që vuajti shumë e që luftojë shumë për lirinë e atdheut të vet”, ka shkruar Tahiri.
