Nënkryetarja e PDK-së, Vlora Çitaku, i ka reaguar zv/kryeministrit Besnik Bislimi, i cili sot tha se migrimi është diçka normale, se është pjesë e tendencave të individit dhe familjeve për të përmirësuar standardet e jetesës.
Çitaku ka shkruar se kësisoj migrimi po trajtohet nga Qeveria në mënyrë tallëse dhe përbuzëse.
Teksa, ka kujtuar kohën kur ishte Ministre e Integrimeve Evropiane dhe si e kishte trajtuar fenomenin e migrimit, së bashku me ish-presidenten Atifete Jahjaga.
“Si sot e kujtoj kohën kur Kosova përballej me një valë të madhe të migrimit. Unë isha Ministre e Integrimeve Evropiane. Sikurse që mbajë mend se atëbotë bartësit e institucioneve të Kosovës, duke filuar nga Presidentja Jahjaga e deri tek secili Kryetarë Komune, ishim në teren, në fshatëra a qytete, për të diskutuar. Ne e pranonim dhe e trajtonim si sfidë dhe si shqetësim. Mundoheshim së paku të dëgjonim”, ka shkruar Çitaku.