Presidentja e Kosovës, Vjosa Osmani, ka përkujtuar 24-vjetorin e Betejës së Çabratit, ku 26 luftëtarë të Brigadës 137 “Gjakova”, të Ushtrisë Çlirimtare të Kosovës e afro 100 banorë civilë u vranë në mënyrë mizore nga makineria gjenocidale serbe e mbi 300 u rrëmbyen me dhunë.
Osmani ka thënë se dëshmorët e UÇK-së janë vula e përjetësisë së shtetit dhe do të kujtohet përherë me respekt.
“26 luftëtarë të Brigadës 137 “Gjakova”, të Ushtrisë Çlirimtare të Kosovës, 24-vjet më parë ranë heroikisht në Betejën e Çabratit, në përpjekjen e tyre për t`u dalë në ndihmë bashkëqytetarëve të tyre, të cilët tri ditë rresht iu nënshtruan veprimeve kriminale të regjimit gjenocidal të Serbisë”, ka thënë Osmani, njofton Presidenca e Republikës së Kosovës.
“Afro 100 banorë civilë u vranë në mënyrë mizore nga makineria gjenocidale serbe, mbi 300 u rrëmbyen me dhunë, teksa lufta për mbrojtjen e pragut të shtëpisë kishte marrë hov gjithandej, afro një muaj përpara se Kosova të bëhej e lirë. I paharruar qoftë kujtimi për ta dhe martirët që u bën guri themeltar i Republikës!”. /teve1.info/
