Aktivisti i Lëvizjes Vetëvendosje, Dardan Krasniqi ka hedhur sot një mori kritikash ndaj partisë, duke përfshirë ministra, deputetë, e zyrtarë tjerë. Për këtë, ai thotë se gjithmonë ka qenë kritik ndaj LVV-së.
Krasniqi theksoi se ai do të kërkojë gjithmonë të bëhet më e mira për vendin, teksa potencoi se shkas i reagimit të tij kanë qenë skenat e djeshme në Kuvend, ndaj deptuetit të LVV-së, Haki Abazi.
“Do të isha qytetari i fundit në atë vend që të flisja për vendin tim me të metat e veta që i ka. Unë flas me keqardhje, e do të isha aktivisti i fundit që do të kisha dëshirë të flisja për Qeverinë e Lëvizjes Vetëvendosje. Unë kam qenë kritik në vazhdimësi, jo tash, por prej që është themeluar LVV-ja. Edhe shokët, edhe miqtë, edhe aktivistët që më njohin, unë njëfarë mënyre jam çdoherë kritik ndaj asaj, dhe kërkoj gjithmonë që të bëhet më e mira për vendin tonë duke pa se çdo vonesë edhe çdo neglizhencë që ia bëjmë punës edhe asaj që kemi borxh atij vendi, është e dëmshme…unë atë që e kam thënë sot qëndron dhe çdo rresht i saj për mua është i dhimbshëm, mirëpo e kam shprehur me një dozë pak më të gjatë, e për cilën ato që janë janë të vërteta. Pra i kam rendit disa gjëra e që kanë qenë shkas, ajo që pashë dje në Kuvendin e Kosovës, kur nuk është standard i LVV-së ato skena, që ndodhën me deputetin Haki Abazi”, deklaroi ai në “Info Nata” në Tëvë 1.
Ish-ushtari i UÇK-së shtoi se do të qëndrojë me LVV-në, por ata që i ka përmendur “është moment të reflektojnë se sinqerisht nuk janë duke parë në realitet çfarë dëmi janë duke i bërë edhe organizatës, edhe qeverisjes”.
Krasniqi në një postim në Facebook ka përmendur sot Mimoza Kusarin, Salih Zybën, Armend Mujën, Luan Dalipin, Nazlie Balajn, Dejona Mihalin, gjersa përmend edhe disa deputetë që siç shkruan ai “me t’u dhimtë që po lejojnë me ndodhë” parregullësi. /Teve1.info/