Prokuroria Themelore në Prizren ka ngritur aktakuzë ndaj një përmbarueseje private në këtë komunë pasi e njëjta gjatë detyrës zyrtare e ka favorizuar njërën palë, duke i shkaktuar dëme materiale palës tjetër, raporton teve1.info
Sipas komunikatës së Prokurorisë, S.K. në cilësinë e përmbarueses private, nuk i ka njoftuar me kohë palët për pagesën e rreth 4 mijë e 500 eurove për një parcelë, derisa të njëjtën e ka publikuar në ankand publik duke tentuar t’i dëmtoj të dëmtuarit E.M. dhe N.M. me banim në Norvegji në vlerë prej 191 mijë euro.
Prokuroria ka ngritur rast për veprën penale “Keqpërdorim i pozitës apo autoritetit zyrtar” ndaj saj dhe ka kërkuar dënimin sipas ligjit të fuqi.
“Sipas aktakuzës, në periudhën kohore prej datës 27.12.2019 e në vazhdim, në Suharekë, e pandehura S.K., në cilësinë e personit zyrtar – përmbaruese private për territorin e Gjykatës Themelore në Prizren, duke shfrytëzuar detyrën e saj zyrtare, i tejkalon kompetencat e saj me qëllim që të përfitojë çfarëdo dobie për personin tjetër, njëkohësisht i shkakton dëm të dëmtuarve, në atë mënyrë që gjatë ndërmarrjes së aktiviteteve përmbarimore, i tejkalon autorizimet e saj duke shkelur afatin partitiv për përmbushje vullnetare të detyrimit, me ç’rast nuk i njofton paraprakisht të dëmtuarit E.M., dhe N.M., me detyrimet që i kanë, lidhur me faturën që e kishte lëshuar kreditorja S.S., vepron në kundërshtim me Ligjin për procedurën përmbarimore, ashtu që të dëmtuarve E.M., dhe N.M., që jetojnë në Norvegji, nuk i njofton asnjëherë për lëshimin urdhërit përmbarimor atakues për pagimin e shumës prej 4.498,50 euro, dhe merr konkluzionin e datës 04.11.2021 për caktimin e seancës së parë të ankandit publik për shitjen e parcelës kadastrale dhe me këtë tenton t’i dëmtojë të dëmtuarit e lartcekur, në vlerë prej 191.000,00 euro, shumë kjo për të cilën është vlerësuar parcela kadastrale në fjalë, njëkohësisht duke pasur për qëllim që avokates S.S., t’i sjell përfitim të kundërligjshëm pasuror në vlerë prej 4.498,50 euro, me ç’ rast i dëmton të dëmtuarit E.M., dhe N.M., në vlerë prej 5.298,50 euro (4.498,50 euro urdhri përmbarimor, 40.00 euro në emër të taksave gjyqësore për ankesë ndaj parregullsive dhe 800,00 euro shpenzimet e udhëtimit e për të gjitha këto veprime të ndërmarra nga e pandehura, të dëmtuarit kuptojnë me datë 30.03.2022 me rastin e nxjerrjes së listës poseduese në ZKK të Komunës së Prizrenit”, thuhet në komunikatë.