Kryeministri i Kosovës, Albin Kurti ka përkujtuar martirët e Masakrës së Bukoshit në përvjetorin e 24-të.
Përmes një postimi në Facebook, Kurti ka thënë se më 3 maj në vitin 1999 oborri i shkollës në Bukosh u mbulua me gjak, ku u vranë 25 burra dhe djem të rinjë, vetëm pse ishin shqiptarë, raporton teve1.info
Kurti theksoi se dëbimi, zhdukja dhe vrasja me forcë e shqiptarëve ishte pjesë e projektit gjenocidal të Serbisë për shfarosjen e shqiptarëve.
“Më 3 maj 1999 oborri i shkollës në Bukosh u mbulua me gjak. 25 burra dhe djem të rinj shqiptarë u pushkatuan. Forcat policore të Serbisë i vranë ata, vetëm pse ishin shqiptarë. I ekzekutuan pasi i ndanë nga kolona e banorëve të fshatrave të Suharekës, që i kishin dëbuar nga shtëpitë e tyre. Dëbimi, vrasja dhe zhdukja me forcë e shqiptarëve ishte pjesë e projektit gjenocidal të Serbisë për shfarosjen e shqiptarëve, “Patkoi”, ka shkruar Kurti.
Tutje, kryeministri Kurti, deklaroi se kriminelët e luftës duhet të nxirren para drejtësisë dhe Serbia duhet të mbajtur përgjegjëse për krimet e luftës.
“Kriminelët e luftës duhet nxjerrur para drejtësisë. Serbia duhet mbajtur përgjegjëse për krimet e luftës, krimet kundër njerëzimit dhe veprimet gjenocidale të kryera në Kosovë”, ka shkruar Kurti.
“Republika e Kosovës nuk mund të falë e as të harrojë”, shtoi ai.
