Njerëz të prekur nga inflacioni dolën në rrugët e kryeqyteteve botërore për Ditën Ndërkombëtare të Punës për të kërkuar drejtësi ekonomike dhe kushte më të mira për punëtorët.
Me një pjesëmarrje rekorde pas dy vjetëve izolim nga pandemia Covid-19, punëtorët anekënd botës të hënën kërkuan që qeveritë e tyre të bëjnë më shumë për t’ua përmirësuar jetën atyre.
Kështu, në Tajvan, mijëra punëtorë dolën në rrugë për të protestuar ndaj politikave të punës, duke ushtruar presion mbi partinë në pushtet përpara zgjedhjeve presidenciale të vitit 2024.
“Paga jonë minimale është vetëm 845 dollarë amerikanë. Kjo nuk mjafton për të jetuar tani, kur çmimi i një veze u rrit në 0,49 dollarë. Qeveria tha se rriti pagën minimale me disa përqindje. Por kjo nuk mjafton më këtë rritje të çmimeve. Kjo e bën të vështirë jetesën”, tha Donny Hsu – punëtor në industrinë e prodhimit të çimentos, raporton AP.
Kushte më të mira të punës dhe kërkesa të tjera patën edhe punëtorët nga Koreja e Jugut.
“Qeveria po përpiqet të rrisë orarin e punës dhe të krijojë më shumë punëtorë jo të rregullt. Ne po luftojmë për të krijuar një botë ku nuk ka më punëtorë jo të rregullt. Ne duam përmirësojmë sistemin ligjor dhe të luftojmë që politikat e qeverisë të garantojnë të drejtat e punëtorëve”, u shpreh Yang Kyeung Soo – president i konfederatës koreane të sindikatave.
E në Indonezi, vendin me ekonominë më të madhe të Azisë Juglindore, punëtorët kërkuan shfuqizimin e ligjit për krijimin e vendeve të punës.
“Nuk mund të themi se gjendja e punëtorëve është e mirë. Ligji për krijimin e vendeve të punës duhet të shfuqizohet për hir të përmirësimit të kushteve në punë”, tha Sri Ajeng – protestues.
Ndërkohë në Francë filluan përgatitjet për protestën më masive kundër reformës së pensioneve të iniciuar nga presidenti francez Emmanuel Macron./Tëvë1/
