Manchester City është lider i ri në Premier League. Skuadra e Pep Guardiolas të dielën fitoi 2:1 në udhëtim ndaj Fulhamit. Ndeshja i ka takuar xhiros së 34-t të kampionatit anglez. Me fitore, Manchester City doli në vendin e parë dhe ka 76 pikë nga 32 ndeshje.
Arsenali është i dyti me 75 pikë nga 33 ndeshje. Arsenali ndeshjen e kësaj xhiroje ndaj Chelseat e luan të martën. Ditë më parë City fitoi derbin ndaj Arsenalit dhe kështu bëri hapin vendimtar drejt mbrojtjes së titullit. Të dielën nuk ka gabuar, duke fituar ndaj Fulhamit.
Erling Haaland vazhdoi me superformë. Ai shënoi nga pika e bardhë në minutën e tretë për 1:0. Ishte goli i tij i 50-të këtë edicion në të gjitha garat. Për norvegjezin ky është një gol historik sepse arriti në kuotën e 34 golave në Premier League, duke barazuar rekordin e vendosur nga Andrew Cole në sezonin 1993-1994 dhe Alan Shearer, i cili e vendosi atë në sezonin 1994-1995.
Carlos Vinicius barazoi rezultatin në 1:1 në minutën e 15-të. Ndërkohë Julian Alvarez shënoi gol në minutën e 36-të, për epërsinë 2:1 të Manchester Cityt.
