Napoli nuk e ka shfrytëzuar mundësinë për ta fituar titullin e kampionit në elitën e futbollit italian.
Pas disfatës që Lazio e pësoi në udhëtim tek Interi, Napoli u desh të fitonte për ta festuar titullin e parë që prej vitit 1990, dhe të tretin në histori të klubit. Por, napolitanët me Amir Rrahmanin në qendër të mbrojtjes, të dielën pasdite, barazuan me Salernitanan në “Diego Armando Maradona”, në kuadër të xhiros së 32-të të Serie A të Italisë. Rrahmani e kompletoi ndeshjen.
Mathias Olivera shënoi në minutën e 62-të për vendësit, kurse Boulaye Dia në minutën e 84-t barazoi shifrat në 1:1. Napoli mbetet në vendin e parë me 79 pikë, 18-të më shumë se Lazio i vendit të dytë. Salernitana që nuk di për humbje në nëntë ndeshjet e fundit, me dy fitore e shtatë barazime, zë vendin e 14-të me 34 pikë.
