“Gjermania mirëpret marrëveshjen e arritur në Ohër në kuadër të dialogut të lehtësuar nga BE-ja”.
Kështu kanë deklaruar nga Zyra e Kancelarit të Gjermanisë në një përgjigje me shkrim për RTK-në, të pyetur se cilat janë pritjet e Gjermanisë nga takimi i 2 majit në Bruksel ndërmjet kryeministrit të Kosovës, Albin Kurti dhe presidentit të Serbisë, Aleksandar Vuçiq, me ndërmjetësimin e BE-së.
Zyra e Kancelarit gjerman deklaron se ky shtet, mirëpret marrëveshjen e arritur në Ohër, për aneksin e zbatimit të marrëveshjes Kosovë-Serbi.
“Marrëveshjes për rrugën drejt normalizimit të marrëdhënieve ndërmjet Kosovës dhe Serbisë”, shkruan në këtë përgjigje për RTK.
“Gjermania rikujton se së bashku me partnerët e saj evropianë dhe ndërkombëtarë, nxit të dyja palët që të zbatojnë në mënyrë të përshtatshme dhe në mirëbesim të gjitha obligimet e tyre përkatëse dhe pa asnjë kusht, përfshirë edhe Asociacionin e Komunave me Shumicë Serbe”.
Sipas shtetit gjerman, takimi i radhës i nivelit të lartë më 2 maj është një hap i rëndësishëm në këtë drejtim.
