Kryetari i Prishtinës, Përparim Rama ka njoftuar se kanë filluar punimet në rrugën A.
Rama përmes një postimi në Facebook, ka thënë se ky projekt infrastrukturor do të lidhë Prishtinën e Re me Kalabrinë, duke i dhënë fund kutërbimeve nga kanalizimi i hapur dhe rrezikshmërisë për fëmijët, shkruan teve1.info
Tutje Rama ka thënë se ndërtimi i rrugës A do ta shkarkoj dukshëm ngarkesën e trafikut në Prishtinë.
“Punimet po i nisim njëkohësisht nga të dyja skajet e rrugës në projektin monumental 240 ditësh, duke sjellë një standard të ri në infrastrukturën e qytetit, me korsi të veçantë për autobusë, shtigje për biçikleta, qasje në rrugët anësore dhe ndërlidhje me Rrugën B.”, ka shkruar Rama.
Ndërsa, kryetari i LDK-së, Lumir Abdixhiku, ka thënë se ky është një nga investimet më të mëdha kapitale në kryeqytet.
Ai tha se Rruga A, me gjashtë korsi, shtigje të biçikletave, trotuare për këmbësorë e me gjelbërim ishte zotim elektoral i tyre.
“Një nga investimet më të mëdha kapitale në Kryeqytet, ai i Rrugës A nisi sot. Prishtinës po i shtohet dhe një segment i ri, që lidhë Rrugën B me përpjetëzen në Veternik. Një lagje e re, një komunitet i ri, një pjesë e bukur e Prishtinës po nisë të formësohet sot.
Rruga A, me gjashtë korsi, shtigje të biçikletave, trotuare për këmbësorë e me gjelbërim ishte zotim elektoral i yni. Investimi i fundit i madh infrastrukturor në Prishtinë, kishte ndodhur 10 vite më parë; ironikisht vet Rruga B, aty ku kjo rrugë e sotme vazhdon.
Kosova mundet më shumë!”, ka shkruar ai në Facebook.
