Kryetari i Partisë Demokratike të Kosovës, Memli Krasniqi ka kritikuar pozitën për “joseriozitetin” që sipas tij, po e tregojnë disa prej deputetëve.
Krasniqi ka thënë se janë befasuese sjelljet e disa prej deputetëve dhe kryeministrit të vendit, në lidhje me debatin që po zhvillohet në Kuvend në lidhje me arrestimin e kryeshefit të KEK-ut, Nagip Krasniqi, teksa ka theksuar se në momentin që është bërë lajmi publik për arrestimin e tij, Kurti është dashur të kërkojë shkarkim të menjëhershëm të bordit dhe kryeshefit të KEK-ut, shkruan teve1.info
Tutje Krasniqi, ka thënë se Qeveria Kurti abuzimet më të mëdha i ka bërë në sektorin e energjisë.
“Po flasim për dyshime të keqpërdorimeve për 72 milionë euro. Keqpërdorimi i këtyre është vazhdim i keqpërdorimit të qindra milionave euro”, tha ai.
“Të gjitha këto shpërfaqin dy gjëra: 1 Qeveria Kurti abuzimet më të mëdha i ka bërë pikërisht në sektorin e energjisë dhe [2] qytetarët e Kosovës sot e kanë jetën më të vështirë si pasojë e këtyre abuzimeve sepse me këto para ka pasur mundësi të bëhen përmirësime të jashtëzakonshme në çdo sektor”, deklaroi Krasniqi.
Tutje kreu i PDK-së, ka kritikuar kryeministrin, Kurti që e ka mbrojtur Nagip Krasniqin dhe sipas tij, ka shantazhuar sistemin e drejtësisë.
Ndryshe, të martën Bordi i Drejtorëve të KEK-ut ka marrë vendim për pezullimin nga detyra e punës së Kryeshefit Ekzekutiv, Nagip Krasniqi me efekt të menjëhershëm./teve1.info
