Në mbledhjen e sotme të Qeverisë, është miratuar edhe vendimi për ndarjen e mjeteve buxhetore për zbatimin e masave të efiçiencës së energjisë.
Me këtë rast, ministri i Financave, Hekuran Murati bëri të ditur se shuma e ndarë do të jetë 10 milionë euro, e cila do të shërbejë për renovimin dhe masa të tjera izoluese, për të rritur efiçiencën e energjisë në ndërtesat e banimit social në tërë Kosovën, përcjell teve1.info
“Kjo masë ka të bëjë me masën 3 që është në kuadër të planit të veprimit, të përgatitur nga Ministria e Ekonomisë, që parasheh pra shtrirjen dhe shfrytëzimin e fondeve mbështetëse të pakos së Bashkimit Evropian për mbështetje për trejkalim të krizës energjetike, në vlerë prej 75 mijë euro. Pra masa në fjalë zbatohet sipas planit të zbatimit për zbutjen e ndikimit menjëhershëm socio-ekonomik të krizës energjetike në kuadër të projetit të ri të masave të efiçiencës së energjisë në sektorin rezidencial, përkatësisht ndërtesa shumëbanesore, si pjesë e masës 3 të planit të veprimit të miratuar nga Qeveria”, theksoi ai.
Ai bëri të ditur se mjetet e ndara merren nga kontigjenca për energji në buxhetin e Kosovës dhe transferohen te Fondi Kosovar për efiçiencë të energjisë.
Ministri Murati shtoi se kjo ndarje bëhet në kuadër të marrëveshjes financiare IPA 3 për pakon emergjente të nënshkruar më datë 24 shkurt të këtij viti, në mes të Qeverisë së Kosovës dhe Komisionit Evropian.
Gjatë kësaj mbledhjeje, Qeveria po ashtu ka miratuar edhe ndarjen e mjeteve buxhetore në vlerë prej 9 milionë euro, në kuadër të masës së mbështetjes në tejkalimin e krizës energjike të Pakos së Ringjalljes Ekonomike, mjete të cilat janë zëvendësim, pasi ishin përdorur për mos ta ndërprerë masën, përkundër që dakordimi për subvencionim ka qenë nga dhjetori e deri në mars.
“Ky propozim ka të bëjë me zëvendësimin e burimit të financimit meqenëse siç e thashë, marrëveshja me Komisionin Evropian është nënshkruar më vonë gjatë këtij viit, dhe ne për të mos ndërprerë masën, kemi vazhdu që të paguajmë nga granti qeveritar përkundër faktit që dakordimi ka qenë që nga dhjetori e deri në mars, që subvencionimi paguhet në muajin prill, të mbulohet nga Bashkimi Evropian në vlerë prej 15 milionë euro. Pra kemi të bëjmë vetëm me zëvendësimin të burimit të financimit, ku në këtë rast mjetet e grantit qeveritar në vlerë 9 milionë euro zëvendësohen me mjetet e fondeve IPA nga pako e Bashkimit Evropian”, deklaroi Murati. /Teve1.info/
