Në mbledhjen e 140-të të Qeverisë së Kosovës janë miratuar tri Projektligje që kanë të bëjnë me tri marrëveshje midis Kosovës dhe Sllovenisë.
Është miratuar Projektligji për Ratifikimin e Marrëveshjes mes Kosovës dhe Sllovenisë për Zbatimin e Ndërsjelltë të Aktgjykimeve në Çështjet Penale, është miratuar edhe Projektligji për Ratifikimin e marrëveshjes për Ekstradim si dhe është miratuar Projektligjit për Ratifikimin e Marrëveshjes për ndihmë të Ndërsjellë Juridike në Çështje Penale.
Kryeministri i Kosovës, Albin Kurti ka thënë se këto Projektligje kërkojnë ratifikimin në Kuvendin e Kosovës, teksa shtoi se shteti i Sllovenisë është mëse i mirëpritur dhe i nevojshëm.
“Janë projektligje që kërkojnë ratifikimin e tyre në Kuvendin e Kosovës, bashkëpunimi ynë me shtetet mike e partnere, siç është Republika e Sllovenisë është mëse i mirëpritur dhe i nevojshëm për qytetarët e dy Republikave tona, bashkëpunimin tonë po e shtojmë në fushën e aktgjykimit në çështjet penale, ekstradimin dhe ndihmën e ndërsjelltë juridike në çështjet penale”, deklaroi Kurti.
E ministrja e Drejtësisë, Albulena Haxhiu theksoi se marrëveshjet janë jashtëzakonisht të rëndësishme dhe prekin të drejtat dhe liritë themelore të njeriut.
“Qeveria e Republikës së Kosovës, konkretisht Ministria e Drejtësisë në bazë të vendimit të Qeverisë ka zhvilluar bisedimet me ministrin e Drejtësisë të Sllovenisë dhe është arritur pëlqimi marrëveshja midis Republikës së Kosovës dhe Republikës së Sllovenisë për ekstradim, marrëveshja për ndihmë të ndërsjellë në çështje penale dhe gjithashtu marrëveshja mes Republikës së Kosovës dhe Republikës së Sllovenisë për zbatimin e ndërsjelltë të aktgjykimeve në çështjet penale”, u shpreh Haxhiu.
“Këto marrëveshje sigurisht që janë jashtëzakonisht të rëndësishme, prekin të drejtat dhe liritë themelore të njeriut të përcaktuar me nenin 18”, përfundoi ajo.
Ajo theksoi që duhet edhe mbështetja nga Kuvendi i Kosovës./teve1.info
