Aplikimi i Kosovës për anëtarësim në Këshillin e Evropës është miratuar nga Komiteti i Ministrave me mbi dy të tretat e votave të nevojshme.
Lajmin e ka bërë të ditur zëvendësministri i Punëve të Jashtme të Kosovës, Kreshnik Ahmeti.
“Aplikimi i Republikës së Kosovës pranohet në Këshillin e Evropës (KE) – faza e parë e procesit kalohet me sukses. Para pak minutash, Komiteti i Ministrave, me mbi dy të tretat e votave të nevojshme, votoi në favor të pranimit të aplikimit të Republikës së Kosovës në KE dhe kërkoi opinionin e Asamblesë Parlamentare (APKiE) mbi këtë aplikim”, ka shkruar ai në Facebook, transmeton teve1.info
Ai ka thënë se ky është një sukses i rëndësishëm për Kosovën.
“Tani, na pret një punë intensive në APKiE, organ i cili do të përpilojë një numër raportesh mbi Kosovën dhe do ta jap opinionin e tij mbi anëtarësimin e saj në KE”, ka thënë Ahmeti.
Kosova aplikoi zyrtarisht më 12 maj të vitit të kaluar për anëtarësim në Këshillin e Evropës.
Kryeministri i Kosovës, Albin Kurti ditë më parë ka thënë se Kosova ka siguruar votat për anëtarësim në këtë organizatë./teve1.info/
