Deklarimet e krerëve të ekzekutivit për pranimin e Asociacionit të Komunave me Shumicë Serbe si një obligim ndërkombëtar që ka marrë Kosova, po shihet si hap i duhur, por i vonuar. Nga spektri opozitar thonë se vonesat i kanë kushtuar shumë Kosovës, sidomos në planin e integrimit të saj euro-atlantik.
Qëndrimi amerikan, se Qeveria e Kosovës ka pranuar asociacionin si obligim ndërkombëtar, në vend po komentohet në forma të ndryshme.
Ministri për Komunitete dhe kthim Nenad Rashiq, në një intervistë për Tëvë1 tha se e mirëpret ndryshimin e qëndrimit të ekzekutivit për çështjen asociacionit.
Ish-kryeministri Ramush Haradinaj, njëherësh kryetar i AAK-së, thotë se asociacioni duhet të bëhet në mënyrë që t’i hapet rrugë anëtarësimit të vendit në partneritet për paqe të NATO-s.
Kurse kryetari i LDK-së, Lumir Abdixhiku thotë se me marrëveshjen e fundit me Serbinë, Qeveria e Kosovës është pajtuar që të fuqizohen Asociacioni dhe statusi i kishës ortodokse.
Asociacioni dhe çështjet që ndërlidhen me dialogun, pritet të jenë temë diskutimi në takimin e nivelit të lartë që do të mbahet më 2 maj në Bruksel.
Kronika e realizuar nga gazetari Valmir Gallopeni
