Qeveria e Kosovës pritet të ndajë 3 milionë euro si pako mbështetëse për komunitetin jo-shumicë.
Në këtë pako përfshihen vende të reja pune për bizneset ekzistuese dhe të reja, ndihmë për bujqit dhe prodhuesit e vegjël në zonat rurale, si dhe ndihmë për shoqërinë civile që kontribuon në integrimin dhe afrimin e komuniteteve jo-shumicë, raporton teve1.info
Zyra e Kryeministrit ka bërë të ditur se miratimi i pakos pritet të bëhet në mbledhjen e radhës së Qeverisë.
Njoftimi i plotë:
Kryeministri i Republikës së Kosovës, Albin Kurti, zëvendëskryeministrja për Çështje të Pakicave dhe Drejtat e Njeriut, Emilja Redžepi, ministri i Financave, Punës dhe Transfereve, Hekuran Murati, ministri për Komunitete dhe Kthim, Nenad Rašić dhe këshilltarja e Kryeministrit për Çështje të Komuniteteve, Elizabeth Gowing, zhvilluan sot gjatë paradites një takim në të cilin diskutuan dhe u dakorduan për pakon e re mbështetëse për komunitetet jo-shumicë në vend.
Kjo pako, që për fillim do të jetë në vlerë prej 3 milionë euro, përmban masa mbështetëse për:
-vende të reja të punës për bizneset ekzistuese dhe të reja;
-bujqit dhe prodhuesit e vegjël në zonat rurale;
-shoqërinë civile që kontribuon në integrimin dhe afirmimin e komuniteteve jo-shumicë.
Miratimi i saj pritet të bëhet në mbledhjen e radhës së Qeverisë. Pakoja synon që përmes punësimit dhe prodhimit të kontribuojë drejtpërdrejt në zhvillimin, mirëqenien dhe integrimin sa më të plotë të komuniteteve jo-shumicë në Republikën e Kosovës.
