Komisioni Qeveritar për Persona të Zhdukur i Republikës së Kosovës, ka mbajtur takimin koordinues të projektit “Përkrahja e vazhdueshme e ICMP në trajtimin e rasteve të personave të zhdukur në Kosovë”.
Përmes një komunikate për media, bëhet e ditur se në fokus të takimit ishte angazhimi institucional me përkrahjen e partnerëve ndërkombëtarë në ‘procesin e inventarizimit të mbetjeve mortore të paidentifikuara’.
“Komisioni Qeveritar për Persona të Zhdukur i Republikës së Kosovës (KQPZh) ishte nikoqir i takimit koordinues të projektit “Përkrahja e vazhdueshme e ICMP në trajtimin e rasteve të personave të zhdukur në Kosovë”. Përpjekjet aktuale në identifikimin e personave të zhdukur u diskutuan në prani të përfaqësuesve të shoqatave të familjarëve të personave të zhdukur. Në fokus të takimit ishte angazhimi institucional me përkrahjen e partnerëve ndërkombëtarë në ‘procesin e inventarizimit të mbetjeve mortore të paidentifikuara’ që vazhdojnë të jenë nën kujdesin e Institutit të Mjekësisë Ligjore, fuqizimi i kapaciteteve të Agjencisë Kosovare të Forenzikës, si dhe përkrahja e vazhdueshme për familjarët e personave të zhdukur dhe shoqatat familjare”, thuhet në komunikatë.
Ndërsa, udhëheqësi i KQPZh, Kushtrim Gara, ka vlerësuar të arriturat e deritanishme, përfaqësuesit e familjarëve të personave të zhdukur me dhunë gjatë luftës, njëherit kërkoi më shumë angazhim dhe përkrahje për familjet, si një nga kategoritë më të goditura gjatë luftës.
Në takim u theksua edhe angazhimi e përkushtimi i Qeverisë Kurti dhe institucioneve relevante për të përmbushur detyrat, përcjell teve1.info.
“Në respekt të së drejtës së familjarëve për të ditur për fatin dhe vendndodhjen e më të dashurve të tyre, të zhdukur me dhunë gjatë luftës në Kosovë. Mbi përkushtimin dhe mbështetjen e vazhdueshme të bashkësisë ndërkombëtare në procesin e ndriçimit të fatit të personave të zhdukur gjatë luftës në Kosovë, në veçanti në këtë fazë të rëndësishme të procesit, para të pranishmëve folën edhe Ambasadori suedez, Jonas Ëesterlund, Zëvendës ambasadori italian, Ugo Ferrero, Shefi i Misionit të KNKK-së, Agim Gashi, dhe Sekretari i Ambasadës Britanike, Edëard Lister”, thuhet tutje në komunikatë.
Projekti “Përkrahja e vazhdueshme e ICMP në trajtimin e rasteve të personave të zhdukur në Kosovë” mbështetet nga Ambasada Suedeze në Republikën e Kosovës dhe Ministria e Jashtme e Republikës së Italisë, ndërsa zbatohet nga Komisioni Ndërkombëtar për Persona të Zhdukur në bashkëpunim me KQPZh dhe institucionet tjera kompetente të Republikës së Kosovës./teve1.info/.
