Ish-drejtori i përgjithshëm i Policisë, Rashit Qalaj, duke folur për situatën e sigurisë në Veri dhe mbajtjen e zgjedhjeve të jashtëzakonshme të 23 prillit, ka deklaruar se pavarësisht tendencave për destabilizim të situatës, zgjedhjet në katër komunat veriore duhet të mbahen.
Madje Qalaj teksa komentoi takimin e sotëm të presidentit serb Aleksandar Vuçiq me Listen Serbe në Rashkë, tha se ky takim konsiderohet si një lloj kërcënimi ndaj votuesve të cilët do të guxojnë të dalin në zgjedhje.
“Votuesit janë të kërcënuar edhe sot në takimin e presidentit serb në Rashkë me Listën Serbe dhe me individ të tjerë, ka bërë thirrje që komuniteti serb në komunat veriore mos të dalë ne votime. Kjo thirrje e një presidenti të një vendi me qëndrim armiqësor duhet të konsiderohet edhe si një lloj kërcënimi ndaj çdo kujt i cili do të guxojë të dalë në zgjedhjet në komunat veriore”, tha ai.
Mirëpo pavarësisht kësaj Qalaj në emisionin “Info Nata” në Teve1, tha se zgjedhjet në komunat veriore duhet të mbahen dhe sipas tij, Komisioni Qëndror i Zgjedhjeve dhe ekspertët e sigurisë duhet të marrin veprime për mbajtjen e zgjedhjeve.
“ Sido që të jetë edhe Këshilli Qëndror Zgjedhor edhe ekspertët e sigurisë duhet të marrin veprime që zgjedhjet të mbahen. Tash KQZ-së i kanë dështuar disa takime dhe çka do të pres, unë e di që ata kërkojnë një vlerësim të rrezikut edhe nga AKI edhe nga Policia, mirëpo duhet pasur guxim dhe të mirren vendime nganjëherë edhe vendime mjaft të vështira, mirëpo procesi duhet të ecë përpara. Ne e dimë që ka me pasë përpjekje për destabilizimin edhe më tutje të atyre katër komunave dhe ky destabilizim do të jetë i dirigjuar dhe i udhëhequr nga presidenti i Serbisë kuptohet me elementet e Listës Serbe”, tha ai.
Teksa theksoi se “ka edhe individ edhe parti politike nga komuniteti serb që kanë shfaq interesimin që të mbahen zgjedhjet dhe ne si shtet kemi obligim që qytetarëve t’ia sigurojmë një të drejtë kushetuese për votime të lira. Edhe në atë pjesë pra institucionet e sigurisë duhet të marrin masat e duhura që këto zgjedhje të mbahen”./teve1.info./
