Karim Benzema dhe Marco Asensio kanë shënuar nga një gol për fitoren e Real Madridit ndaj Chelseat. Madridi fitoi 2:0 të mërkurën mbrëma në “Santiago Bernabeu” në ndeshjen e parë çerekfinale të Ligës së Kampionëve.
Madrilenët kanë dominuar në fushë, ndërsa kanë rrezikuar dukshëm më tepër se londinezët. Benzema gjeti rrugën drejt portës në minutën e 22-të për të vazhduar me formë të lartë. Me rezultatin 1:0 përfundoi pjesa e parë.
Ndërkohë Marco Asensio konkretizoi me gol një aksion të bukur të Real Madridit në minutën e 74-t. Chelsea prej minutës së 59-të luajti me një lojtar më pak në fushë. Ben Chilwell u ndëshkua me karton të kuq. Ndonëse fitorja e madrilenëve është bindëse, skuadra gjysmëfinaliste do të përcaktohet në ndeshjen e kthimit që zhvillohet në “Stamford Bridge” më 18 prill.
Edhe Milan fitoi në San Siro me rezultatin 1-0 në ndeshjen e parë çerekfinale të Champions League ndaj Napolit. Kuqezinjtë shfrytëzuan një gol në minutën e 40-të të pjesës së parë teksa shfrytëzuan në maksimum një kundërsulm që u finalizua nga Bennacer. Në fraksionin e dytë, napoletanët provuan të barazonin, por miqtë mbetën me 10 lojtarë pasi Anguissa mori dy të verdha brenda pak minutave.
Megjithatë, Napoli tentoi deri në fund për barazimin, por Maignan me pritjet e tij mbajti në fuqi fitoren e kuqezinjve. Në javën e ardhshme, në stadiumin Maradona pritet një përballje e fortë teksa rezultati lë gjithçka hapur edhe pse Milan niset i avantazhuar.