Presidentja e Kosovës, Vjosa Osmani, po qëndron për vizitë në Kalabri, ku sot është takuar me kryetarin e Rajonit të Kalabrisë, Roberto Occhito, me të cilin ka biseduar mbi shtrirjen e mëtejme të bashkëpunimit mes Kosovës dhe Kalabrisë.
Osmani ka thënë se kujdesi ndaj të drejtave të bashkësive etnike kontribuon në mënyrë aktive edhe në zhvillimin ekonomik të Italisë.
Në njoftimin e Presidencës së Kosovës, është bërë e ditur se presidentja ka falënderuar kryetarin Oschiuto për kujdesin ndaj ruajtjes së identitetit kombëtar të arbëreshëve.
“Jemi të bindur se mund të ndiqen politika aktive për respektimin e gjuhëve të pakicave, për të mbrojtur dhe përmirësuar gjuhën dhe trashëgimin kulturore të pakicave gjuhësore dhe historike të Kalabrisë, përfshirë bashkësinë arbëreshe. Përmirësimi i mëtejmë i politikave për ruajtjen dhe promovimin e gjuhës e të traditave është e ndërlidhur me politikat e shkollimit në gjuhën e pakicave”, tha presidentja Osmani.
Gjithashtu, u njoftua se në këtë takim është diskutuar edhe për mundësinë e zgjerimit të bashkëpunimit ekonomik mes Kosovës dhe Italisë, duke përfshirë edhe Rajonin e Kalabrisë.
“Ne duhet t’i afrojmë edhe më tej operatorët tanë ekonomikë e turistikë, në mënyrë që të krijohen itinerare të përbashkëta turistike nga Kalabria për në Kosovë dhe anasjelltas”, tha Osmani. /teve1.info/