Njohësi i çështjeve politike, Ardian Arifaj për gjykimin e ish-presidentit të Kosovës, Hashim Thaçi dhe tre ish-krerëve të Ushtrisë Çlirimtare të Kosovës ka thënë se nga Gjykata Speciale presin drejtësi dhe asgjë tjetër.
Arifaj ka thënë se pret drejtësi e jo politikë, sipas tij, Gjykata Speciale duhet të marrë vendime në bazë të fakteve dhe argumenteve që prezantohen aty.
“Presim të ketë drejtësi, të mos ketë politikë, të shohin faktet, argumentet të merret çfarëdo vendimi në bazë të fakteve, argumenteve që do të prezantohen aty. Asgjë më shumë se kaq. Vetëm drejtësi asgjë tjetër”, ka thënë ai në emisionin “Info Nata” në Tëvë1.
Analisti shpreson që procesi gjyqësor të përfundojë sa më shpejtë, pavarësisht numrit të madh të dëshmitarëve që janë thirrur nga prokuroria.
“Presim të ketë drejtësi, sepse për ata është themeluar nga institucionet e Kosovës, nuk kemi pse të presim diçka tjetër. Sapo ka filluar procesi, shpresojmë që të përfundojë sa më shpejtë, jo të zgjatet, ndonëse mbetet të shihet sa do të jetë e mundur kjo për shkak të numrit të madh të dëshmitarëve që i ka thirr prokuroria”, ka thënë tutje Arifaj.
Ai thotë se përmes fjalimeve të ish-krerëve është parë një konsistencë në qëndrimin e tyre, e që kjo e bënë edhe më të fortë që betejën ta kalojnë së bashku.
“Është inkurajuese me dëgju çdo fjalim që kanë mbajtur këto dy ditë të pandehurit, shihet një konsistencë në qëndrimin e tyre, ajo që është edhe më e mirëseardhur ishte që kishin një qëndrim të njëjtë secili prej tyre, pra kjo i bën edhe më të fortë në një mënyrë po e vazhdojnë këtë betejë së bashku”, ka shtuar analisti.
Sipas tij, për Kosovën është e rëndësishme që gjykimi të përfundojë sa më parë, sepse në pyetje është imazhi i Kosovës, lufta dhe angazhimi për liri.
“Sa do të zgjasë mbetet të shihet. Për Kosovën është e rëndësishme të kryhet sa më parë, sepse kjo është e rëndësishme jo vetëm për ish-presidentin Thaçi dhe tre të tjerët, edhe të akuzuarit në lëndë tjera, por është e rëndësishme edhe për tërë Kosovën, sepse pa marrë parasysh kush çfarë thotë në pyetje është imazhi i Kosovës, është vetë lufta e Kosovës, angazhimi i Kosovës për liri, për shtet, edhe për të gjitha ato që janë arritur deri më tani”, përfundoi Arifaj.
